Header Ads

شعرك جاف ومتقصف وعيتي بالوصفات بدون نتيجة؟؟ جبت ليك الحل وغيبان ليك الفرق مع أول استعمال

شعرك جاف ومتقصف وعيتي بالوصفات بدون نتيجة؟؟ جبت ليك الحل وغيبان ليك الفرق مع أول استعمال

جبت ليك يا لالة وصفة أنا جربتها شخصيا وعطاتني نتيجة واعرة لشعري ، كنت ديما كنعاني مع شعري ، قتلتو بكثرة سيشوار  وليميش وعاد صبايغ، حتى تحرقلي ونشف ولا يتنفخلي بزاف، فين ما كنت نغسل شعري كان خصني ضروري سيشوار أو البلاك أو غايجيني شوهة وماعندو حتى منظر.
ولكن مين اكتشفت واحد الوصفة قالتهالي جداتي الله يخليها ليا ، أقسم بالله يلا نفعتلي شعري وبان ليا الفرق من أول استعمال شعري نزل شوي ورطابلي ومابقيتش محتاجة لسيشوار .. ومبغيتش هاد الوصفة تبقى عندي غير بوحدي قلت نشاركها معاكم حتى نتوما حيت عارفة المعاناة ديال البنات مع شعر ديالهم… وأكيد الشعر يلا كان صحي ورطيطب غايزيد من جمال ديال المرأة، المهم بلا منزيد نطول عليكم غانقول ليكم شنو درت لشعري.
يا لالة أول حاجة درتها هو حيدت لي بوانت لشعري حيت قررت نعالجو ونريحوا من السيشوار وميمكنش نعالجوه وهو متضرر بزاف.
من بعد شريت واحد الحشبة سميتها ” اللزاز” راها كتشبه الحنة سيري عند العطار وغتلقايها عندو، هاد العشبة كانو جدودنا كيستعملوها لشعرهم ودابا جدة والله حتى شعرها حسن من شعري كحل ورطب وشيب عندها غير فالنوادر ماشي بحالي مزال في العشرينات والشيب طرطق ليا بالصبايغ هههه.
المهم كتشدي مقدار من اللزاز وكتخلطيه مع ماء دافئ بحال يلا غتخلطي الحنة ميكونش خفيف وميكونش تقيل، وتبداي دهنيه فشعرك خصلة بخصلة مزياان وغطيه بميكة وديري درة باش يعراق ليك وخليه نهار كامل وغسليه في العشية.. أنا من بعد الغسيل درت حتى الغاسول والله النتيجة واعرة من أول استعمال أما يلا داومتي عليه ديك ساع تشوفي شعرك كيف غايولي.
جربيه وغاتدعيلي.

ليست هناك تعليقات